काठमाडाैं। लामो समयदेखि रिक्त रहेको निर्वाचन आयोगमा आयुक्तको नियुक्तिका लागि अाज संवैधानिक परिषद्ले सिफारिश गरेको छ । प्रधानमन्त्री दाहालको अध्यक्षतामा सम्पन्न परिषद् बैंठकमा प्रधानन्यायाधीश सुशीला कार्की, सभामुख ओनसरी घर्तिमगर, प्रमुख प्रतिपक्षी दल नेकपा (एमाले)का अध्यक्ष केपी शर्मा ओली र उपसभामुख यादव उपस्थित थिए ।

सिंहदरबारस्थित प्रधानमन्त्रीको कार्यालयमा शुक्रबार प्रधानमन्त्री पुष्पकमल दाहालको अध्यक्षतामा बसेको परिषद् बैठकले आयुक्तको नियुक्तिको सिफारिश गरेको हो । परिषद्को सिफारिश निर्णय संसदीय सुनुवाइका लागि शुक्रबार नै संसदीय सुनुवाइ विशेष समितिमा पठाइएको छ ।

परिषद्ले ईश्वरीप्रसाद पौडेल, नरेन्द्र दाहाल र सुधिरकुमार शाहलाई सिफारिश गरेको उपसभामुख गङ्गाप्रसाद यादवले जानकारी दिए । पौडेल पूर्व रक्षा सचिव हुनभने दाहाल निर्वाचन आयोगको पूर्वसचिव हुन् । यस्तै शाह पूर्व सहसचिव हुन् ।

सिफारिश भएका तीनै जनालाई संसदीय सुनुवाइ विशेष समितिले अनुमोदन गरेपछि राष्ट्रपतिले नियुक्त गर्ने कानुनी प्रावधान रहेको छ । नियुक्तिसँगै निर्वाचन आयोगले पूर्णता पाउनेछ । हाल अायोगमा प्रमुख निर्वाचन आयुक्त डा. अयोधीप्रसाद यादव र निर्वाचन आयुक्त इला शर्मा मात्र रहेका छन् ।