नेपाल कम्युनिष्ट पार्टीका अध्यक्ष पुष्पकमल दाहाल प्रचण्डले अब दुनियाँको कुनै पनि ताकतले आफूहरुलाई हराउन नसक्ने बताएका छन् ।

२६ औं मदन आश्रित स्मृति दिवसका अवसरमा मदननगर बल्खुमा आयोजित कार्यक्रममा अध्यक्ष प्रचण्डले विरोधीहरुलाई नेकपा अब अर्को धातुले बनेका मान्छे रहेछन् भन्ने देखाइदिने बताएका हुन् । उनले २००७ सालदेखिको कम्युनिष्टहरुलाई अपमानित गर्ने प्रवृति हालसम्म पनि रहेको र त्यसबाट आफूहरु भने विचलित नभएको बताए ।

उनले कम्युनिष्ट पार्टीलाई विभाजित गर्ने क्रियाकलाप आफूहरुले देखेको तर आफ्ना कार्यकर्ताको त्याग र तपस्याको परिणामले त्यो अर्थपूर्ण भएको बताए । नेकपाका केही नेताले पनि मदनलेझै कार्ल माक्र्सको विचारलाई नयाँ परिस्थितिमा नयाँ विचारको रुपमा अघि बढाउनुको सट्टा पुरानै कुरा दोर्होयाइरहेको तर्क गरे । उनले माक्र्सवाद डग्मा, प्राग्मा, कुरान, बाइबलको रूपमा नभइ विज्ञानको रुपमा बुझ्नुपर्ने बताए ।

उनले आँखा नदेख्ने भएर पार्टी एकता नगरेको तत्कालीन कार्यनीति जनताको जनवाद र दीर्घकालीन लक्ष्य वैज्ञानिक समाजवाद भएको बताउँदै समाजवादको नयाँ मोडल स्थापित गर्ने दृढता व्यक्त गरे । उनले विकासवादको नयाँ मोडल दिने चुनौति स्वीकार गर्दै आफ्नो पार्टी अघि बढेको बताए । उनले भने,‘ पार्टी एकता तीन महिनाभित्र गर्ने भनेको ढिलो भयो। एक वर्ष भयो। तर अब केही मात्रै काम बाँकी छन्। आत्तिनुपर्ने छैन।’