महानगरीय ट्राफिक प्रहरी महाशाखाले काठमाडौं उपत्यकाभित्र मोटरसाइकलमा पछाडि बस्नेले पनि हेलमेट लगाउनु पर्ने नियम फेरि ल्याउने तयारी गरेको छ ।

उपत्यका भित्र भएका दुर्घटनाको विश्लेषण गर्दै तीनै जिल्लामा मोटरसाइकल पछाडि बस्नेले हेलमेट लगाउनु पर्ने नियम ल्याउन लागिएको महानगरीय ट्राफिक प्रहरी महाशाखाका प्रमुख एसएसपी वसन्त पन्तले जानकारी दिए ।

प्रहरीले यातायात व्यवस्था विभागलाई यातायात व्यवस्था ऐनमा नै राखेर मोटरसाइकल चालकले हेटमेट लगाउनु पर्ने नियम ल्याउने प्रक्रिया सुरु भएको पन्तले बताए । यसमा विभाग पनि सकारात्मक देखिएको उनले बताए ।

यसअघि २०६५ सालमा मोटरसाइकलका पछाडि बस्ने यात्रुले पनि हेलमेट लगाउनुपर्ने नियम लागु गरिएको थियो । त्यो बेला यो नियमको आलोचना भएको थियो ।

ट्राफिक प्रहरीले पछि यो नियम खारेज गरेको थियो । बिना ऐन ल्याइएको नियम भएकोले पनि पहिला यो नियमलाई कडाइका साथ लागू गर्न ट्राफिक प्रहरी असफल भएको थियो ।

त्यसै कारण पनि अहिले ट्राफिक प्रहरी महाशाखा ऐनमै व्यवस्था गरेर यो नियम ल्याउन लागिपरेको छ । त्यसैगरी, महाशाखाले काठमाडौं उपत्यकाबाट तीन पाङ्ग्रे र सार्वजनिक साना सवारी हटाइने तयारी गरेको छ ।

टेम्पो र सानो आकारको माइक्रोबसको संख्या बढी भएकाले उपत्यकाको ट्राफिक व्यवस्थापन असहज भएपछि यातायात व्यवस्था विभागको नीतिगत सहयोगमा महानगरीय ट्राफिक प्रहरी महाशाखाले यस्ता सवारी हटाउने भएको हो ।

कम सीसीका सवारी साधनले क्षमताभन्दा बढी यात्रु बोक्दा दुर्घटनाको जोखिम रहेको महाशाखाको निष्कर्ष छ ।