प्रमुख विपक्षी नेपाली कांग्रेसले सरकारमाथि राज्य नियन्त्रित प्रेस बनाउन खोजेको आरोप लगाएको छ । संसदमा दर्ता भएको मिडिया काउन्सिल विधेयक स्वीकार्य नभएको भन्दै उसले सदनमा प्रवेश नै नगराउन माग गरेको छ ।
प्रतिनिधिसभाको बुधबारको बैठकमा विशेष समय लिएर बोल्दै कांग्रेस सचेतक पुष्पा भुसालले संविधानको मूल्य मान्यताविपरित विधेयक आएको बताइन् । उनले विधेयकलाई संसदको प्रक्रियामा नै नल्याउन माग गरिन् ।
बैठकमा सत्तारुढ नेकपाका सांसद महेश बस्नेतले नेपाली कांग्रेसले गठन गरेको छाया सरकारप्रति व्यंग्य गरे । उनले कांग्रेसले सरकारसँग संवाद र सहकार्य गर्नका लागि नै छाया सरकार गठन गरेको होला भन्ने आफूलाई लागेको बताए ।
सांसद बस्नेतले छायाँ सरकारको कार्यकाल २०÷३० वर्ष रहोस्, भन्ने शुभकामना दिए । राजपा नेपालका सांसद प्रमेद साहले गिरिशचन्द्र लाल आयोगको प्रतिवेदन सार्वजनिक गर्न माग गरेका थिए ।
