नेपाली कांग्रेसका नेताहरुले मुलुकमा संवैधानिक संकट निम्तिन सक्ने भएकाले प्रधानमन्त्रीलाई जिम्मेवार बन्न आग्रह गरेका छन् ।
काठमाडौ क्षेत्र नम्बर एकमा पार्टीको राष्ट्रिय जागरण अभियान कार्यक्रमलाई आइतबार सम्बोधन गर्दै कांग्रेस नेता प्रकाशमान सिंहले वर्तमान सरकार नै संघीयता असफल बनाउन लागिरहेको आरोप लगाए ।
प्रधानमन्त्री केपी शर्मा ओलीका अभिव्यक्ति संविधानको मर्म र भावना विरुद्ध आउन थालेकाले मुलुकमा संवैधानिक संकट निम्तिन सक्ने भन्दै उनले जिम्मेवार बन्न आग्रह गरे । संविधानमाथि कोही पनि हुन नसक्ने भएकाले दम्भ र अहंकार त्यागेर संविधानको पालना गर्न प्रधाननमन्त्रीलाई सुझाव दिए ।
प्रचारबाजीमा अल्झिएर जनतासँग सरकारको भावनात्मक सम्बन्ध टुटेको दिन बल्ल प्रधानमन्त्रीको अहंकारको अन्त्य हुने उनले बताए ।
कांग्रेस केन्द्रीय सदस्य बालकृष्ण खाँणले सरकारका गतिविधिविरुद्ध अब सडकदेखि सदनसम्म सशक्त रुपमा उत्रिने परिस्थिति आएकाले एक भएर लाग्न कार्यकर्तालाई निर्देशन दिए । उनले आफुहरु प्रेस र नागरिक अधिकारको रक्षाका लागि खरो रुपमा प्रस्तुत हुने बताए ।
