नेत्रविक्रम चन्द नेतृत्वको नेकपाले आह्वान गरेको नेपाल बन्दको आंशिक प्रभाव परेको छ ।
आफ्ना कार्यकर्ता मारिएको विरोधमा नेकपाले आह्वान गरेको बन्दको आंशिक प्रभाव परेको हो । काठमाडौं उपत्यकामा सवारी साधन अघिपछिको तुलनामा केही कम चलेका छन् । मुख्य बजार बन्द छन् भने, भित्रि सडकका अधिकांश पसल खुला नै छन् ।
शैक्षिक संस्था भने बन्द भएका छन् । काठमाडौं उपत्यकाबाहिरका जिल्लामा भने बन्दको प्रभाव परेको छ । अधिकांश जिल्लामा सवारी सञ्चालनमा आएका छैनन् भने उद्योग, कलकारखाना र शिक्षण संस्था ठप्प भएका छन् ।
भोजपुरमा आफ्ना कार्यकर्ता तीर्थ घिमिरे मारिएको विरोधमा चन्द नेकपाले बन्द आह्वान गरेको हो । बन्दका क्रममा कुनै अप्रिय घटना नहोस् भनेर ठूलो संख्यामा सुरक्षाकर्मी परिचालन गरिएको छ । यसैबीच, बन्दकर्ताले बारामा भारतीय नम्बरको ट्रक जलाएका छन् ।
बाराको जीतपुरसिमरा उपमहानगरपालिका बजनीमा रोकिराखेको भारतीय लरीमा अज्ञात समूहले आगजनी गरेको छ । त्यसैगरी मकवानपुरको थाहा नगरपालिकामा गाडी जलाइएको अवस्थामा फेला परेको छ । त्यसैगरी त्रिभुवन राजपथ अन्तरगत हेटौंडाको चौकीटोलमा मिनी ट्रकमा आगजनी भएको छ ।
