२०७२ सालको भूकम्पपछि बन्द भएको तातोपानी नाका मंगलबारदेखि सञ्चालनमा आएको छ । मंगलबार बिहान ४ वटा कन्टेनर ऊन ल्याउन खासा पठाएपछि नाका खुलेको हो ।

ती कन्टेनर बुधबार काठमाडौ आइपुग्ने बताइएको छ । भूकम्पले नेपाल चीन जोड्ने मितेरी पुल भत्किएपछि तातोपानी नाका बन्द भएको थियो । अहिले पनि मितेरीपुलको निर्माण भैरहेको छ ।

नेपाल–चीन जोड्ने मितेरी पुल निर्माणको काम भैरहेकाले अस्थायी चल्तीमा ल्याइएको पुलमुनिको कच्ची सडकबाट नै कन्टेनर गएका चीनतर्फ गएका हुन् । भूकम्पपछि आएको पहिरोले क्षतिग्रस्त बनेको लिपिङ र तातोपानी क्षेत्रका सडक पुनःनिर्माण भइसकेको छ ।

चिनियाँ कम्पनी चाइना रेलवे कन्ट्रक्सन ग्रुप कम्पनीले अन्तर्राष्ट्रियस्तरको अत्याधुनिक सुख्खा बन्दरगाह र कोदारी राजमार्ग बनाइसकेको छ । कम्पनीले मितेरी पुलको बुधबारसम्म सबै काम सक्ने जनाएको छ ।