अमेरिकी भिसाको लागि अब आवेदकले सामाजिक सञ्जालको विस्तृत विवरण पेश गर्नु पर्ने भएको छ ।
अमेरिकी विदेश मन्त्रालयले जारी गरेकोे पछिल्लो नियममा आवेदकले सामाजिक सञ्जालको नाम, ५ वर्ष यताका इमेल ठेगाना र फोन नम्बर पनि बुझाउनुपर्ने जनाइएको छ ।
गएको वर्ष यस सम्बन्धी प्रस्ताव पेश गरिएका बेला यसबाट वार्षिक रुपमा एक करोड ४७ लाख मानिस प्रभावित हुने आँकलन गरिएको थियो । तर केही कूटनीतिक र सरकारी अधिकारीले भने भिसा निवेदन दिँदा यस्तो जानकारी पेश गर्नु पर्ने छैन । तर काम तथा अध्ययनका लागि अमेरिका जान चाहने व्यक्तिले भने सम्पूर्ण जानकारी पेश गर्नु पर्ने भएको छ ।
अमेरिकी नागरिकको सुरक्षाका लागि स्क्रिनिङ्ग प्रक्रिया परिष्कृत गर्ने योजना अनुसार नयाँ नियम लागु गरिएको विदेश विभागले बताएकोे छ ।
यसअघि सीमित निवेदकले मात्रै यस्तो जानकारी पेश गर्नु पर्ने थियो । तर अब भने सबै निवेदकले आफ्ना सामाजिक सञ्जाल एकाउन्टका नामहरु दिनु पर्ने भएको छ ।
