मुस्लिम धर्मावलम्बीको महान् चाड इद मनाएर ओमनबाट दुबई आउँदै गरेको पर्यटक बस दुर्घटना हुँदा १७ जनाको मृत्यु भएको छ भने अन्य ५ जना सख्त घाइते भएका छन् ।
मृतक १७ मध्ये १० जना भारतीय पर्यटकहरु रहेका छन् भने बाँकीको पहिचान हुने क्रम जारी रहेको सञ्चारमाध्यमहरुले जनाएका छन् । ३१ जना यात्रुहरु सवार रहेको उक्त बस ओमानको राजधानी मस्कटबाट दुबई आउँदै थियो ।
शेख मोहम्मद विन जायद सडकमा स्थानीय समयअनुसार साँझ ५ः४० मा भएको दुर्घटनाग्रस्त बस ओमानको रहेको जनाइएको छ । दुर्घटनामा घाइते भएका बिरामीहरुलाई दुबईको रसिद अस्पतालमा उपचारका लागि लगिएको जनाइएको छ ।
उक्त बसका चालकले दुबईको सडक नियम उल्लंघन गरेर गाडी चलाइरहेको सञ्चारमाध्यमहरुले जनाएका छन् । ट्राफिकको साइडबोर्डहरुको वास्ता नगरी बस चलाएका कारण दुर्घटना भएको दुबई प्रहरीले जनाएको कुरा सञ्चारमाध्यममा उल्लेख छ ।
