काभ्रेपलाञ्चोक जिल्ला तेमाल गाउँपालिका–५ सस्र्यूखर्कका बासिन्दाले गाउँमा पानीको हाहाकार भएपछि रुद्री तथा क्षमापूजा गरी शनिबार पानी मागेका छन् ।
उनीहरुले एक लाख पिपलको पातमा ‘हरहर महादेव, पानी देऊदेऊ’ र ‘रामराम’ लेख्दै कोशीदेखास्थित सुनकोशी नदीमा बगाएका थिए ।
वर्षा नभएर खेतबारी बाँझै भएको तथा मूल सुक्दै जाँदा खानेपानीको हाहाकार भएपछि धार्मिक मान्यताअनुसार रुद्रीपूजा र क्षमापूजा गरी महादेवसँग पानी मागिएको स्थानीय प्रविन अधिकारीले बताए ।
धार्मिक मान्यताअनुसार करीब १०० स्थानीयवासी पूजामा सहभागी थिए ।
त्यसगरी एक दशकअघि नमोबद्ध नगरपालिका भकुण्डेमा वर्षा नहुँदा स्थानीयवासी दाहाल परिवारको अगुवाइमा धार्मिक परम्पराअनुसार नै भ्यागुताको विवाह गरिएको थियो ।
