नेपालको तराई क्षेत्रसँग सीमा जोडिएको भारतको उत्तर बिहार क्षेत्रमा बाढीका कारण ८ जनाको मृत्यु भएको छ ।

घटनामा सयौं घाइते भएका छन् । भीषण वर्षासँगै विभिन्न नदीमा आएको बाढीले ठूलो भूभाग डुबानमा परेको भारतीय अधिकारीहरुले जनाएका छन् । कमला, बागमती, गण्डकी, कोशीलगायतका नदी बढेर बस्तीमा पुगेपछि ठूलो संख्यामा मानिसहरु विस्थापित भएको जनाइएको छ ।

कमला नदीको तटबन्ध फुटेपछि जयनगरका ९० प्रतिशत भन्दा बढी घर डुबानमा परेका छन् । स्थानीय प्रशासनले त्यहाँको बजार खाली गराएको छ । भारतले नेपालसँगका अधिकांश सीमा क्षेत्रमा पर्खाल लगाएकाले नदी आसपासको क्षेत्रमात्र डुबानमा परेको छ । नदी प्रभावित क्षेत्रमा भने डुबानको असर बढी देखिएको जनाइएको छ ।

भारत सरकारले विभिन्न सहर क्षेत्रमा बाढीको प्रभाव न्युनिकरणका लागि लगाएका पर्खालहरु भत्किएको र लाखौं मानिस विस्थापित हुने अवस्थामा रहेको अधिकारीहरुले जनाएका छन् ।