रूसको साइबेरिया क्षेत्रमा एक सुन खानी भत्किँदा कम्तीमा १५ जनाको मृत्यु भएको छ ।

गैरकानुनी रूपमा सुन निकाल्न साइबा नदीमा बनाइएको बाँध भत्किँदा खानीमा काम गर्ने श्रमिकको मृत्यु भएको हो । घटनामा कम्तीमा १४ जनाभन्दा बढी पुरिएर बेपत्ता भएका बताइएको छ ।

खानीमा काम गर्ने श्रमिक सुतिरहेको समय बाँध फुटेर आएको हिलोसहितको पानीले उनीहरूलाई बगाएको रूसी सञ्चार माध्यमहरूले उल्लेख छन् ।

घटनापछि करिब ३ सय उद्धारकर्मी र ६ हेलिकोप्टर घटनास्थलमा पुगेका र बेत्ताहरूको खोजी भइरहेको रूसी विपद् व्यवस्थापन मामिला हेर्ने मन्त्रालयले जानकारी गराएको छ । तर, घटनास्थल निकै दूरदराजमा रहेकोले उद्धार प्रयास निकै कठिन भएको अधिकारीहरूले बताएका छन् ।

उक्त घटनामा परी घाइते बनेका १४ जनालाई अस्पताल पठाइएको र तीमध्ये दुईजनाको अवस्था गम्भीर रहेको बताइएको छ । रूसका हिमाली तथा पहाडी क्षेत्रमा गैरकानुनीरूपमा सञ्चालनमा रहेका खानीहरूमा आवश्यक सुरक्षामा ध्यान नर्पुयाइँदा वर्षेनी सयौँ श्रमिकको मृत्यु हुने गरेको छ ।