पाकिस्तानको दक्षिणी सहर मुल्तानमा बहाउद्धिन जकारिया विश्व विद्यालयका लेक्चरर जुनैद हफीजलाई ईश निन्दाको अभियोगमा अदालतले मृत्यु दण्डको सजाय सुनाएको छ ।

३३ वर्षीय जुनैद हफीजलाई मार्च २०१३ मा पक्राउ गरिएको थियो । उनीमाथि सामाजिक सञ्जालमा पैगम्बर मोहम्मदको विरुद्धमा अपमानजनक टिप्पणी पोस्ट गरेको आरोप लगाइएको थियो ।

अतिरिक्त जिल्ला न्यायाधीशले हफीजमाथि ५ लाख रुपैयाँ जरिबाना पनि तोकेका छन् । ईश निन्दालाई पाकिस्तानमा निकै गम्भीरतापूर्वक लिने गरिएको छ ।

हाफीजको पक्षबाट वकालत गर्ने वकिल राशिद रहमानलाई २०१४ मा गोली हानेर हत्या गरिएको थियो । त्यसपछि सो सम्बन्धी मुद्दा हेर्न कोही पनि वकिल तयार भएनन् ।

अन्तिममा एकजना वकिल उनको पक्षमा मुद्दा लड्न तयार भएकोमा उनलाई पनि धम्की दिइएको थियो । उनका वकिलले यो फैसलाका विरुद्ध पुनरावेदन गर्ने जनाएको बीबीसीले जनाएको छ ।