बस्टन । अमेरिकाको न्यूयोर्कमा कोरोना भाइरसको संक्रमणबाट एक नेपालीको मृत्यु भएको छ ।

न्यूयोर्कको कुइन्सस्थित ज्याकशन हाइट ९० स्ट्रीटमामा बस्दै आएका ५० बर्षिय अनिल लिम्बुको मृत्यु भएको हो । मृतक लिम्बु नेपालको पाँचथर रानीगाउँका हुन् । 

कोरोना भाइरसको संक्रमणबाट न्यूयोर्क Elmhurst Hospital मा उपचारको क्रममा उनको मृत्यु भएको हो । उनी केही समय देखी मधुमेह र ब्लड प्रेसरको औषधी सेवन गर्दै आएका थिए ।

नेपालि जनसम्पर्क समिती अमेरिकाको सदस्य लिम्बुका श्रीमती, दुई छोरा र एक छोरी छन् । उनी बिगत २० वर्षदेखि अमेरिकामा बस्दै आएका थिए ।

लिम्बु एकसाता अगाडि ज्वरो आएपछि अस्पतालमा गएका थिए । प्रारम्भिक चेकअपपछि कोरोना संक्रमणको आशंकामा अस्पतालमा भर्ना गरिएको थियो । 

रिपोर्टमा कोरोना संक्रमण पोजेटिभ देखिएको थियो । तीनदिनदेखि भने स्वास्थ्यस्थीति गम्भिर भएकाले भेन्टिलेटरमा राखिएको थियो ।