छिमेकि मुलुक भारतमा कोरोना भाइरस संक्रमितको संख्या १ लाख ४५ हजार नजिक पुगेको छ ।
एकै दिन थप ६ हजार ४ सय १४ जनामा संक्रमण सुष्टिभएसँगै संक्रमितको संख्या १ लाख ४४ हजार ९ सय ५० पुगेको हो ।
भारतमा कोरोनाको संक्रमणबाट हालसम्म ४ हजार १ सय ७२ जनाको मृत्यु भएको छ । पछिल्लो २४ घण्टामा थप १ सय ४८ जनाको मृत्यु भएको छ ।
कोराना भाइरसको संक्रमण फैलिने नरोकिएपछि भारतमा मार्च २४ देखिको लकडाउन ३१ मे सम्म पुर्याइएको छ । भाईरस संक्रमण तीव्र रूपमा फैलिरहे पनि करिब दुई महिनायता बन्द रहेको आन्तरिक हवाई सेवा सोमबारदेखि नियमित गरिएको छ ।
कोरोना महामारी नियन्त्रण र रोकथामका लागि भन्दै २५ मार्चदेखि आन्तरिक र अन्तर्राष्ट्रिय उडान बन्द गरिएका थिए । संक्रमण फैलने क्रम जारी रहे पनि लामो समय उडान बन्द गर्दा अर्थतन्त्रमा धक्का पुग्ने भएपछि खोल्ने निर्णय गरिएको हो । हाललाई केही सीमित उडान मात्र सञ्चालन हुने भएका छन् ।
आन्तरिक उडानका लागि विदेशबाट आएका यात्रुले कोरोना भाइरसको संक्रमण नभएको प्रमाणपत्र पेश गर्नुपर्ने साथै हवाइ सेवा लिएका यात्रुले १४ दिन सेल्फक्वारेन्टाइनमा बस्नुपर्ने स्वास्थ्य मन्त्रालयले जारी गरेको निर्देशिकामा उल्लेख छ । अन्तर्राष्ट्रिय उडान भने भारतले बन्द नै राखेको छ ।
हवाइ सेवासँगै रेल र बस सेवा पनि सुरु गरेको छ । हवाइ र रेल सेवा देशभर सञ्चालन हुने छ भने बस सेवा राज्यभित्र मात्रै सञ्चालन हुने जनाएको छ ।
यस्तै, दिल्ली तथा मुम्बईबाट उडानको तयारी भएपनि बिभिन्न राज्यहरुले पर्याप्त तयारी नभएकाले ब्यवस्थापन गर्न नसक्ने जानकारी गराएसँगै धेरै उडानहरु रद्द भएका थिए । दिल्ली विमानस्थलबाट मात्रै ८२ वटा आन्तरिक उडान रद्ध भएसंगै अन्तिम समयसम्म पनि सूचना नपाएको भन्दै यात्रुहरु आक्रोशित भएका थिए ।
