काठमाडौं । नेपालमा कोरोना भाइरस विरुद्ध अमेरिकी खोप लगाउन थालिने भएको छ । सो अमेरिकी खोप ‘जोन्सन एण्ड जोन्सन’ कम्पनीले उत्पादन गरेको हो । यो खोप एक मात्रा लगाए पुग्ने बताइएको छ ।

विश्व स्वास्थ्य संगठनको कोभ्याक्स सुविधा मार्फत अमेरिकाले नेपाललाई यो खोप उपलब्ध गराएको हो । यो खोप लगाउन ४४ खोप केन्द्र तोकिएका छन् । पछिल्लो समयमा अमेरिकाले नेपाललाई जोन्सन एन्ड जोन्सनको १५ लाख ३४ हजार ८५० डोज खोप उपलब्ध गराएको थियो ।

यो खोप ५० देखि ५४ वर्ष उमेर समूहलाई लगाउने निर्णय गरेको स्वास्थ्य तथा जनसंख्या मन्त्रालयले जानकारी दिएको छ । पूर्ण र अति अशक्त अपांगता भएका नागरिक, नेपालमा बसोबास गरिरहेका शरणार्थी र यसअघि खोप लगाउन छुटेका स्वास्थ्य संस्थामा कार्यरत स्वास्थ्यकर्मी, कर्मचारी र सरसफाइकर्मीले समेत यो खोप लगाउन पाउने छन् ।