एजेन्सी । अफगानिस्तानका मुख्य शहरहरुमा तालिबान लडाकु र सरकारी सेनाबिच भिडन्त भइरहेको छ । दक्षिण तथा पश्चिमी क्षेत्रका शहरहरुमा सरकारी सेनाबाट खोसेर ती शहरहरु आफ्नो नियन्त्रणमा लिने प्रयासमा तालिबान लडाकु रहेका छन् ।

हेरात, लश्कर गाह र कान्दाहर शहर कब्जामा लिने प्रयासमा तालिबान लडाकु सरकारी सेनासँग भिडन्त गरिरहेको छ । अमेरिकीसहितका अधिकांश विदेशी सैनिकहरु सेप्टेम्बरको अन्त्यसम्ममा फिर्ता हुने घोषणासँग तालिबानले ग्रामीण क्षेत्रहरुमा आफ्नो पकड तीव्र रुपमा बिस्तार गरेको छ ।

प्रमुख शहरहरुमा भने अझै पनि सरकारी सेनाको नियन्त्रण छ । यी शहरहरु नियन्त्रणका लागि तालिबानका तर्फबाट हुने प्रयास र रोक्नका लागि सरकारी सुरक्षाबलले गर्ने प्रतिकारका कारण गम्भीर मानवीय संकट आउन सक्ने भन्दै चासो र चिन्ता व्यक्त भएको छ ।