काठमाडौँ । सूचनाको हकका लागि राष्ट्रिय महासङ्घ जिल्ला कार्यसमिति काठमाडौँले सुशासनका लागि सूचनाको हक अभियान सञ्चालन गर्ने भएको छ ।
महासङ्घ जिल्ला कार्यसमिति काठमाडौँले आज यहाँ आयोजना गरेको अन्तरक्रियात्मक प्रशिक्षण कार्यक्रममा जिल्लाका ११ वटै स्थानीय तहका वडा कार्यालयमा सूचना अधिकारीको व्यवस्था गराउने, नागरिक बडापत्र राख्न लगाउने र वडा कार्यालयसम्म गएर सूचना माग्न नागरिकस्तरमा जागरणमूलक कार्यक्रम सञ्चालन गर्ने जानकारी गराइएको हो ।
सूचनाको हक कार्यान्वयनका लागि आयोग र स्थानीय सरकारलाई पनि सहयोग गर्ने गरी महासङ्घ जिल्ला कार्य समिति काठमाडौँले अभियान चलाउन लागेको हो ।
कार्यक्रममा आयोगका आयुक्त रत्नप्रसाद मैनालीले पारदर्शिताका लागि काम गर्न सूचनाको हकको क्षेत्र खाली रहेको उल्लेख गर्नुहुँदै व्यक्तिगत र सार्वजनिक सरोकारका विषयमा सूचना माग गरेर नागरिकले काम गर्न सक्ने बताए ।
नेपालमा तीन करोड जनसङ्ख्या भए पनि वार्षिकरूपमा आयोगसम्म एक हजारदेखि एक हजार ५०० सम्म मात्र पुनरावेदन आउने गरेको उनले जानकारी गराए । सार्वजनिक सरोकारका विषयमा चियापसल, चोक, चौतारामा टीकाटिप्पणी गर्ने तर सूचना माग गर्न नजाने प्रवृत्तिमा सुधार ल्याउन अभियानकर्मी लागिपर्नुपर्ने आयुक्त मैनालीको भनाइ थियो ।
विभिन्न समयमा गठन भएका जाँचबुझ आयोगले दिएका प्रतिवेदन सार्वजनिक गर्न आयोगले सरकारलाई निर्देश दिएको छ । सूचनाको हकको कानूनले मात्र नागरिकलाई सार्वजनिक निकायसँग प्रश्न गर्ने अधिकार दिएको छ । महासङ्घ काठमाडौँ उपत्यका प्रदेश अध्यक्ष ताराबहादुर भण्डारीले सूचनाको हकका क्षेत्रमा काठमाडौँमा थिति बसाल्न सके यसको सन्देश देशभर जाने बताए । कार्यक्रममा जिल्ला कार्यसमिति काठमाडौँका पदाधिकारी र सदस्य, ११ वटै स्थानीय तहका संयोजकको सहभागिता रहेको थियो ।
