भजनी । कैलालीको टीकापुर क्षेत्रको विकासका लागि साझा सम्भावनाको खोजी सुरु भएको छ । सीमित व्यक्ति, राजनीतिक दल विशेष गरेर टुक्रे विकासले समग्र टीकापुरको सम्भावनालाई मूर्तरुप दिन नसकिने भन्दै सामूहिक एकताका साथ सझा सम्भावनाको खोजीका लागि छलफल र बहस सुरु भएको हो ।
कांग्रेस केन्द्रिय सदस्य तथा प्रतिनिधिसभा सदस्य ईश्वरी न्यौपानेले समग्र टीकापुर क्षेत्रको विकास हुन नसक्नुको कारण सामूहिक एकताको अभाव भएको बताइन् । उनले सामूहिक एकता हुन नसकेकै कारण टीकापुर क्षेत्र पछाडि परेको र त्यसलाई मूर्तरुप दिन सबैको गन्तव्य एउटै हुनुपर्ने उल्लेख गरिन् ।
“हामी चाहन्छौँ हाम्रो क्षेत्र विकासको गतिमा अघि बढोस् । तर त्यो काम कसले गर्ने भन्ने अन्योलमा हामी सधैँ रहने गरेका छौँं ।” न्यौपाने भन्छिन्,“अब टीकापुरको सम्भावनालाई पछ्याउनका लागि राजनीतिक आस्था र व्यक्तिगत स्वार्थबाटमाथि उठेर सामूहिक एकतामा जोडिन सक्नुपर्छ ।” निर्वाचनको समयमा मात्रै राजनीतिक दल र राजनीतिक आस्थाका पछाडि लाग्न आग्रह गर्दै न्यौपानेले विकासमा सबैको सामूहिक एउटै आवाज हुन जरुरी रहेको बताइन् ।
टीकापुर नगरपालिकाका नगर प्रमुख रामलाल डगौरा थारु काम गर्दै जाँदा असहयोग गर्नुपर्छ भन्ने मानसिकता बोकेर हिँड्नेका कारण चाहेर पनि राम्रो गर्न नसकिएको बताउछन् । उनी भएका सम्भावनालाई स्थानीय स्रोतसाधनले भ्याएसम्म काम गर्ने हुटहुटीले आफूहरु अग्रसर भए पनि पछाडिबाट खुट्टा तान्ने प्रवृत्तिले त्यसलाई टुङ्गोमा पु¥याउन नसकिएको दाबी गर्छन् ।
“चाहेर मात्रै काम गर्न नसकिँदो रहेछ । फेरि नागरिकको मानसिकतामा नै सबै काम जिम्मेवार पदमा बसेको व्यक्तिले नै गर्नुपर्छ भन्ने छ ।”, थारु भन्छन्, “एउटाले काम गर्न खोज्ने अर्कोले खुट्टा तान्ने प्रवृत्ति रहिरहरने हो भने हामीले गन्तव्य भेटाउन मुस्किल हुन्छ ।”
स्थानीय नागरिक अगुवा भीमराम चपाईले प्रतिनिधिसभा सदस्य न्यौपानेलाई पहिला टीकापुर क्षेत्रबाट प्रतिनिधित्व गर्ने सबै सांसदको सामूहिक छलफल गर्न वातावरण बनाउन सुझाव दिएका छन् । उनले लक्ष्य ठूलो लिए पनि सुरुआत शून्यबाटै गर्नुपर्ने बताए । चापागाईले भने “हामी टीकापुर विमानस्थलको कुरा गर्छौँं वा सम्भावना भएको टीकापुर उद्यानको कुरा गर्छौंँ विमानस्थलमा पहिला त्यसमा सानै जहाज भए पनि सञ्चालनमा ल्याएर त हेरौंँ । त्यसपछि ठूलो जहाजको विकल्प खोजाँैंला ।”
टीकापुर बहुमुखी क्याम्पसका क्याम्पस प्रमुख केशरबहादुर कुँवर टीकापुरको प्रमुख सम्भावना कृषि भएको बताउछन् । कृषिको हबको रुपमा विकास गर्न लाग्नुपर्नेमा उनले जोड दिए । कुँवरले क्याम्पसको अतिक्रमित व्यवस्थापनका लागि पहल गरेर अध्ययन भइरहेको कृषि विषयलाई प्रभावकारी बनाउन सके त्यसले टीकापुरको सम्भावनालाई मद्दत पुग्ने विश्वास व्यक्त गरे । टीकापुर अस्पताल व्यवस्थापन समितिका अध्यक्ष झपट सोडारीले इच्छाशक्ति भए काम गर्न कतै अप्ठ्यारो नहुने तर सामूहिक एकता र नेतृत्वमा इच्छाशक्तिको अभावले कैयौँ काम ओझेलमा परेका बताए ।
माओवादी केन्द्रका प्रदेशसभा सदस्य दयाराम सञ्ज्यालले टीकापुर क्षेत्रको सम्भावनाका विषयमा ढिलै भए पनि सामूहिक बहसको सुरुवात सकारात्मक भएको टिप्पणी गरे । उनले युवालाई देशमै बस्न सक्ने वातावरण सिर्जना गर्न सके ठूलो उपलब्धि मान्न सकिने बताए ।
