काठमाडौं । सरकारले सार्वजनिक सडकसम्बन्धी कानुन संशोधन र एकीकरण गर्न बनेको विधेयकलाई मस्यौदा गर्न सैद्धान्तिक स्वीकृति प्रदान गरेको छ ।

मन्त्रिपरिषद्‌ले उक्त विधेयक मस्यौदा गर्न सैद्धान्तिक सहमति दिएको हो।
त्यस्तै मन्त्रिपरिषद्‌ले विधेयक समितिबाट पेस भएको सवारी तथा यातायात व्यवस्था (नवौ संशोधन) नियमावलीलाई स्वीकृत गरेको छ ।

मन्त्रिपरिषद्‌ले सुर्खेतको गुर्भाकोट नगरपालिका, म्याग्दीको मंगला गाउँपालिका, संखुवासभाको चैनपुर नगरपालिका, रौतहटको गुजरा नगरपालिका, गुल्मीको मुसिकोट नगरपालिका  र  म्याग्दीको मालिका गाउँपालिकामा परियोजनाका लागि जग्गा प्राप्त गर्न स्वीकृति दिने निर्णय गरेको छ ।

त्यस्तै ललितपुरको झरुवारासीको करिब १३ रोपनी जग्गा आयुर्वेद स्वास्थ्य केन्द्र ललितपुरलाई उपलब्ध गराउने निर्णय गरेको छ । असार १२ गते बसेको मन्त्रिपरिषद् बैठकले यो सहित १३ निर्णय गरेको हो ।