काठमाडौं । राष्ट्रिय स्वतन्त्र पार्टी (रास्वपा)का बझाङ जिल्ला संयोजक नगेन्द्र खड्कालाई कारवाही गरिएको छ ।
उनीमाथि जिल्लाका एक पत्रकारलाई हातपात गरेको आरोप लागेको थियो । सोही आरोप लागेपछि विवादमा आएका खड्कालाई रास्वपाले पार्टीबाट निलम्बनको कारवाही गरेको हो ।
रास्वपाको अनुशासन समितिको सिफारिसमा महामन्त्री डा। मुकुल ढकालले खड्कालाई निलम्बन गरेको जनाइएको छ । बझाङको सामुदायिक रेडियो खप्तड आवाज र नेपाल एडलक अनलाइनमा कार्यरत पत्रकारलाई घरबाटै अपहरण गराएर होटलमा लगी कुटेको आरोप लागेको थियो ।
नेपाल पत्रकार महासंघ बझाङ शाखाले विज्ञप्ति जारी गर्दै पार्टी संयोजक खड्कामाथि कारवाहीको माग गरेको थियो भने रास्वपाको अनुशासन समितिले पनि जाँचबुझ गरेको थियो ।
