काठमाडौं । प्रधानमन्त्री पुष्पकमल दाहाल प्रचण्डमाथि नेकपा एमालेका अध्यक्ष केपी शर्मा ओलीले कडा कटाक्ष गरेका छन् ।

एमालेले आइतबार आयोजना गरेको पत्रकार सम्मेलनमा उनले सरकार भ्रष्ट र नालायक भएको भन्दै प्रधानमन्त्रीमाथि आक्रोश पोखेका छन् । साथै उनले प्रधानमन्त्रीलाई राजीनामा दिन समेत सुझाएका छन् । गृह र अर्थमन्त्रीले त अहिलेसम्म राजीनामा नदिनु आश्चर्य भएको उनको तर्क छ ।
‘यति अयोग्य, यति नालायक सरकारको यस्तो भ्रष्टाचारको चाङमा उभिएर म नेतृत्व गर्छु भन्न अठ्यारो हुनुपर्ने हो’ ओलीले प्रधानमन्त्रीलाई भने, ‘उहाँले आफैं राजीनामा गर्नुपर्ने हो ।’

गृहमन्त्री नारायणकाजी श्रेष्ठ र अर्थन्त्री डा. प्रकाशशरण महतले राजीनामा नगर्नु त अनौठो र आश्चर्य भएको उनले बताए । ‘राजीनामा नगरेर कसरी बस्न सकेको ? आठौं कि नवौं आश्चर्य भन्नुपर्छ’ ओलीले भने, ‘त्यसमा पनि गृहमन्त्री जसको अभिभारा हो, त्यो बहन नगरेर फेरि पनि मन्त्री भएर झण्डा हल्लाएर हिंड्नअप्ठ्यारो लाग्नुपर्ने होइन ?’

२ साउनमा काठमाडौं सिनामंगलबाट बरामद सुनको विषयमा एमालेले उच्चस्तरीय छानबिन समिति गठनको माग गर्दै आएको छ ।