काठमाडौं । काडमाडौंस्थित अमेरिकी दूतावासले डाइभर्सिटी भिसा (डीभी) र गैरआप्रवासी भिसाका नियमित अपोइन्टमेन्ट अनिश्चितकालका लागि रद्द गरेको छ ।

दूतावासले सोमबार सूचना जारी गरी कोरोना भाइरस (कोभिड–१९) को सङ्क्रमणको कारण मङ्गलबारदेखि लागु हुने गरी डीभी तथा गैरआप्रवासी भिसाका नियमित अपोइन्टमेन्ट रद्द गरेको जानकारी गराएको छ ।

दूतावासले निकालेको सूचनामा जतिसक्दो चाँडो भिसा सेवा पुनःसञ्चालन गर्ने तर अहिले नै समय तोक्न भने नसकिने जनाएको छ । भिसा शुल्क जुन देशमा भुक्तानी गरिएको हो, त्यही देशमा भुक्तानी मितिको एक वर्षसम्म भिसा आवेदनका निम्ति मान्य रहने दूतावासले जनाएको छ ।  दूतावासले अनावश्यक यात्रा नगर्न अनुरोध गरेको छ । यात्रा गर्नैपर्ने अवस्थामा भने आकस्मिक अपोइन्टमेन्ट अनुरोध गर्न सकिने दूतावासले जनाएको छ ।