काठमाडौं । मेरियट होटलको कोठा नम्बर ७०१ देखि ७१५ सम्म नयाँ पार्टी गठन गर्न समाजवादी पार्टीबाट विद्रोह गरेका संसदहरू बसेको खुल्न आएको छ ।
समाजवादी पार्टीका केन्द्रीय सदस्य र सञ्चार बिभाग उपप्रमुख विश्वदिप पाण्डेले आफ्नो फेसबुकमा स्टाटस लेख्दै प्रधानमन्त्री केपी ओलीले उनीहरूलाई बस्न र खानको व्यवस्था गरेको उल्लेख गरेका छन् ।
पाण्डेले भनेका छन्, ‘पाँचतारे मेरियट होटल, नक्सालमा समाजवादी पार्टीका सांसदहरुलाई प्रमको तर्फबाट हिजोबाट खान बस्न सबै व्यवस्था गरिएको छ । ७०१-७१५ सम्मका कोठामा समाजवादीका सांसदहरूलाई, केहीलाई डर, केहीलाई मन्त्री पद र केहीलाई आर्थिक लगायत प्रलोभन देखाएर, राखिएको छ ।’
उनका अनुसार अपरण गरिएका भनिएका सुरेन्द्र यादव सुरक्षा घेरातोडी भाग्न सफल भएका छन् । यादव अहिले पार्टीको सम्पर्कमा आएको समेत उनले भनेका छन् ।
पाण्डे आफैले यादवलाई लिएर सुरक्षित स्थानमा राखिएको समेत खुलासा फेसबुक मार्फत गरेका छन् ।
पूर्व आइजिपी सर्वेन्द्र खनाल, महेश बस्नेत र व्यापारी किसान श्रेष्ठले काठमाडौंबाट प्रमको निर्देशनमा सुरेन्द्र यादवलाई मन्त्री बनाउने हो हिँड्नुस् काठमाडौ भन्दै दबाब दिँदै प्रमसँग फोनमा कुरा पनि गराएर सरकारी गाडीमा काठमाडौ ल्याइएको समेत विश्वदिप पाण्डे बताएका छन् ।
यस्तो आरोपका सम्बन्धनमा बालुवाटार स्रोतसँग सम्पर्क गर्न खोज्दा सम्पर्क हुन सकेन ।
