काठमाडौं । सरकारले मंसिर १ गतेदेखि सबै विदेशी पर्यटकलाई नेपाल आउन दिने गरि कार्यविधि तयार पारेको छ ।
नेपाल पर्यटन बोर्डले गठन गरेको टुरिजम रिकभरी टास्कफोर्सले सो कार्यविधि तयार गरेको हो । टास्कफोर्सले सो कार्यविधिमा सबै मुलुकबाट आउने पर्यटकलाई ९२ घण्टा अघिको पिसीआर रिपोर्टलाई मान्यता दिने जनाएको छ ।
नेपाल एशोसिएसन अफ टुर एण्ड ट्राभल एजेण्टस् (नाट्टा)अध्यक्ष अच्युत गुरागाईँले कार्यविधि कार्यान्वयनमा ल्याउन मन्त्रिपरिषदमा पत्राचार गरेको बताए । उनले कार्यविधिमा पर्यटकलाई तीन दिन होटलमै राख्नका लागि प्रस्ताव गरेको बताए ।
अध्यक्ष गुरागाईँले पर्यटक सहजताका लागि विमानस्थलमै पिसीआर मेसिन राख्नका लागि अनुरोध गरेको बताए । उनले तीन दिन होटलमै राख्ने र पुनः पिसीआर परीक्षण गरी नेगेटिभ रिपोर्ट भएका पर्यटकलाई भ्रमणमा सहभागिता गराउन सरकारलाई आग्रह गरेको बताए ।
