काठमाडौं । विश्व बैंकले नेपालसहित ५० मुलुकलाई ४ अर्ब अमेरिकी डलर बराबर खर्च ब्यहोर्ने भएको छ । विकासशील र विकासोन्मुख मुलुकहरुले यो सुविधा पाउनेछन् । यो सहयोग पाउनेमा आधाभन्दा बढी अफ्रिकी मुलुकहरु छन् । इन्टरनेसनल डेभलपमेन्ट एसोशियसन (आइडीए) मा आवद्ध र गरिब मुलुकहरुलाई लक्षित गरी यो कार्यक्रम ल्याइएको विश्व बैंकले जनाएको छ ।
यसरी प्राप्त हुने रकम अनुदान हो भने अनुदानमा आएको रकम कोभिड १९ महामारी रोकथाम तथा नियन्त्रण र भ्याक्सिन कार्यक्रमका लागि खर्च गर्नुपर्नेछ । कोभिड १९ महामारीपछि विश्व बैंकले स्वास्थ्य क्षेत्रमा मात्र १ खर्ब ५० अर्ब अमेरिकी डलरभन्दा बढी खर्च गरिसकेको जनाएको छ ।
महामारीले सामाजिक र आर्थिक अवस्थामा पारेको असरलाई मध्येनजर गरी विभिन्न कार्यक्रममार्फत् यो रकम खर्च गरेको हो । विश्व बैंकबाट पाएको रकमलाई अफ्रिकन मुलुकहरुले अफ्रिकन भ्याक्सिन एक्विजिसन टास्क टिम (एभिएटीटी) वा कोभ्याक्स कार्यक्रममार्फत खर्चन सक्नेछन् ।
भ्याक्सिन खरिद, ढुवानी, भण्डारण, वितरणसँगसँगै जनसचेतनाका कार्यक्रमका पनि यो रकम खर्चन सकिने विश्व बैंकले जनाएको छ । कोभिड भ्याक्सिनका लागि घोषणा भएको यो रकम पाउने दक्षिण एसियाली मुलुकहरुमा नेपालसहित अफगानिस्थान, बंगलादेश र पाकिस्तान परेका छन् ।
