काठमाडौं । प्रतिनिधि तथा प्रदेश सभाको निर्वाचनमा गजबका तथ्यहरु फेला परेका छन् । उम्मेद्वारहरुले आफूलाई नै मत नहाल्नेदेखि समर्थक र प्रस्तावकले मत नहालेको तथ्य फेला परेको छ ।

निर्वाचन आयोगले सार्वजनिक गरेको मत परिणामअनुसार शून्य मत ल्याउने उम्मेदवारको सङ्ख्या पनि कम छैन । धनुषा जिल्लाको निर्वाचन क्षेत्र नं। ३ का स्वतन्त्र उम्मेदवार रमणकुमार सिंहले शून्य मत पाउनुभएको छ । काठमाडौँ जिल्लाको क्षेत्र नं। ५ को प्रदेशतर्फको २ नम्बर क्षेत्रबाट स्वतन्त्र उम्मेदवार नानीमैया श्रेष्ठले पनि शून्य मत पाउनुभएको छ । उम्मेद्वार आफैँलाई पनि मत नदिएको कुरालाई अनौठौ रुपमा लिइएको छ । त्यस्तै उम्मेद्वारका समर्थक र प्रस्तावको मत नपाउनु पनि अपत्यारिलो मान्न सकिन्छ ।

निर्वाचनमा उम्मेदवार भएका कतिपय स्वतन्त्र तथा साना दलका उम्मेदवारले एकदेखि १० मत पाउनेको सङ्ख्या भने धेरै छ । प्रतिनिधिसभा तथा प्रदेशसभा सदस्य निर्वाचनमा धेरै मत ल्याएर विजयी हुने र थोरै मत अन्तरले पराजित फरक फरक तथ्य बाहिर आएको छ ।