काठमाडौं । लुम्बिनी प्रदेशमा सत्तारुढ गठबन्धनभित्र नेपाली कांग्रेस र माओवादी केन्द्रबीच कुरा मिलेको छ । उनीबीच प्रदेश सरकारको नेतृत्व आलोपालो गर्ने सहमति भएको स्रोतले जनाएको छ ।
स्रोतको अनुसार पहिलो चरणमा नेपाली कांग्रेस संसदीय दलका नेता डिल्लीबहादुर चौधरी मुख्यमन्त्री बन्ने बताइएको छ ।
नयाँ सरकार गठनका लागि प्रदेश प्रमुख अमिक शेरचनले दिएको समयसीमाभित्र सत्ता गठबन्धनमा आवद्ध ८ दलले नेपाली कांग्रेस संसदीय दलका नेता चौधरीलाई मुख्यमन्त्रीमा प्रस्ताव गर्दै प्रदेश प्रमुखलाई हस्ताक्षर बुझाउने भएका छन् ।
एक विश्वसनीय स्रोतले प्रदेश प्रमुखसमक्ष ५३ सांसदको हस्ताक्षरसहित दाबी पेस गर्ने तयारी भएको बताएको छ ।
प्रदेश प्रमुख शेरचनले संविधानको धारा १६८ को उपधारा २ अनुसार मंगलबार सरकार गठन आह्वान गर्दा बिहीबार अपराह्न ४ बजेसम्मका लागि समयसीमा तोकेका हुन् ।
त्यस्तै, लुम्बिनी प्रदेशमा माओवादी र नेपाली कांग्रेसबीच सरकारको नेतृत्व आलोपालो गर्ने सहमति भएको छ । स्रोतले भन्यो, ‘हामीबीच पहिले नै आधाआधा कार्यकाल नेतृत्व गर्ने सहमति भएको छ, त्यसमा कुनै विवाद छैन ।’
सो सहमति अनुसार पहिलो चरणमा नेपाली कांग्रेस संसदीय दलका नेता डिल्लीबहादुर चौधरी मुख्यमन्त्री बनेपछि माओवादी लुम्बिनी प्रदेश संसदीय दलका नेता जोख बहादुर महरा मुख्यमन्त्री बन्ने भएका छन् ।
नेकपा माओवादी केन्द्रका प्रदेश अध्यक्ष सुदर्शन बरालले कांग्रेस र माओवादीबीच आलोपालो सरकारको नेतृत्व गर्ने समझदारी भएको बताए ।
८७ सदस्यीय लुम्बिनी प्रदेशसभामा एमालेका २९, नेपाली कांग्रेसका २७, माओवादीका ११, राप्रपा र नागरिक उन्मुक्ति पार्टीका ४÷४ जना, जनमत पार्टी, जनता समाजवादी पार्टी (जसपा) र लोकतान्त्रिक समाजवादी पार्टी (लोसपा) का ३÷३ जना, राष्ट्रिय जनमोर्चाका १, नेकपा एकीकृत समाजवादी १ र स्वतन्त्र १ सांसद छन् ।
