काठमाडौं । केन्द्रीय अनुसन्धान ब्युरो (सीआईबी)ले सर्वोच्चको आदेशविरुद्ध ‘भ्याकेट’ निवेदन दायर गरेको छ ।

ललिता निवास प्रकरणमा जोडिएका १७ जनालाई ‘पक्राउ नगर्नु’ भन्ने सर्वोच्चको अन्तरिम आदेशविरुद्ध प्रहरीले ‘भ्याकेट’ निवेदन दायर गरेको हो ।

सर्वोच्च अदालतले हिजो सोमबार सीआईबीको निवेदन दर्ता गरेको थियो । २०७९ साउन १९ मा न्यायाधीश ईश्वरप्रसाद खतिवडाले ललिता निवास प्रकरणमा जोडिएका १७ जनालाई ‘किर्ते मुद्दामा पक्राउ नगर्नु, नगराउनु’ भन्दै अन्तरिम आदेश दिएका थिए ।

सर्वोच्चको अन्तरिम आदेश देखाएर १२ असारमा पक्राउ परेका मालपोत कार्यालय डिल्लीबजारका तत्कालीन प्रमुख कलाधर देउजा, अधिकृत सुरेन्द्रमान कपाली र हुपेन्द्रमणि केसीलाई रिहा गरिएको थियो ।

यस्तै, सीआईबीको नियन्त्रणमा रहेका रहेका भाभटेनी डेभलपमेन्ट कम्पनी प्रा.लिका सञ्चालक मीनबहादुर गुरुङ र पूर्व निर्वाचन आयुक्त सुधीर शाहले दिएको बन्दी प्रत्यक्षीकरण रिटमा आज मंगलबार तोकिएको सुनुवाइ ’हेर्न नभ्याइने‘मा परेको छ ।