काठमाडौं । आज बिहान १० बजेर १३ मिनेट जाँदा लुक्लास्थित टावरमा अन्तिमपटक सम्पर्क भएको र त्यसपछि सम्पर्कविहीन भएको मनाङ एयरको हेलिकोप्टर दुर्घटनामा चालकसहित ६ जनाकै मृत्यु भएको छ । कोसी प्रदेश प्रहरी प्रमुख डीआईजी राजेशनाथ बास्तोलाका अनुसार हेलिकोप्टरमा सवार रहेका एक नेपाली चालक चेतबहादुर गुरुङ र पाँचजना मेक्सिकन नागरिक गरी ६ जनाको मृत्यु भएको हो ।

९एन–एएमभी कलसाइन रहेको हेलिकोप्टर सोलुखुम्बुको सुर्केबाट स्थानीय समयअनुसार बिहान १०ः५ मा पाँच जना यात्रु लिएर काठमाडौंका लागि उडेको थियो भने उडेको ८ मिनेटमै सम्पर्कविहीन भएको हेलिकोप्टर पिके पिक क्षेत्रमा दुर्घटनामा परेको थियो ।

हिजो माउन्टेन फ्लाइटमा गएको हेलिकोप्टर लुक्लामा बसेर त्यहाँबाट फर्किँदै गरेको थियो ।

हेलिकोप्टर दुर्घटनामा परी पाइलट गुरुङसहित मेक्सिकन नागरिक सीफुन्ट जी फर्नाडो, रिनकोन स्मार, सीफुन्ट मारिया, गुन्जालेज ओलाक्लो र जोन्जालेक्स एब्रिकको मृत्यु भएको छ ।