काठमाडौं । कोशी प्रदेश सरकारका मुख्यमन्त्री उद्धव थापाले आज पद तथा गोपनीयताको सपथ लिन लागेका छन् । मंगलबार नेपालको संविधान २०७२ को धारा १६८ (२) बमोजिम नियुक्त भएका थापाले आज प्रदेश प्रमुख परशुराम खापुङसमक्ष मुख्यमन्त्रीको पद तथा गोपनीयताको सपथ लिने भएका हुन् ।
मुख्यमन्त्री थापाले आफूसहित अन्य तीन मन्त्रीको साथमा सपथ लिन लागेका छन् । आज मन्त्रीको सपथ लिन लागेकामा मंगलबार सभामुखबाट राजीनामा दिएका नेकपा (माओवादी केन्द्र)का बाबुराम गौतम, नेपाली कांग्रेसको तर्फबाट प्रदीपकुमार सुनुवार र नेकपा (एकिकृत समाजवादी)बाट कमल जबेगु रहेको बताइएको छ ।
यसअघि असार २१ गतेमुख्यमन्त्रीमा नियुक्त भएका थापालाई सभामुख रहेका गौतमलेसमेत समर्थन गरेको र उनले दलीय स्वतन्त्रता विपरीत समर्थन गरेको भन्दै सर्वोच्च अदालतले साउन ११ गते थापालाई मुख्यमन्त्रीमा नियुक्त गर्ने निर्णय खारेज गरिदिएको थियो । सभामुखको हैसियतमा छुट्टै हस्ताक्षर लिएर सरकारको दाबी गरेर नियुक्त भएका थापाको नियुक्ति असंवैधानि रहेको कारण देखाउँदै सर्वोच्चको पूर्ण इजलासले थापालाई पदमुक्त गरेको थियो ।
९३ सदस्यीय प्रदेशसभामा सबैभन्दा ठूलो दल रहेको नेकपा (एमाले)का ४०, नेपाली कांग्रेसका २९, नेकपा (माओवादी केन्द्र)का १३, राष्ट्रिय प्रजातन्त्र पार्टी (राप्रपा)का ६, नेकपा (एकिकृत समाजवादी)का ४ र जनता समाजवादी पार्टी (जसपा)का १ जना सांसद छन् । थापा एमाले र राप्रपा बाहेकका ४७ जना सांसदहरुको समर्थनमा ४७ सांसदको समर्थनसहित मुख्यमन्त्रीमा नियुक्त भएका हुन् ।
