संसद्मा दर्ता भएको मिडिया काउन्सिल विधेयकको विरोधमा पत्रकारहरुले नयाँ बानेश्वरमा प्रदर्शन गरेका छन् ।
पहिलो चरणको आन्दोलनको अन्तिम दिन शुक्रबार पत्रकारहरुले आफ्ना सञ्चार साधनसहित प्रदर्शन गरेका हुन् ।
विधेयकका केही प्रावधानले स्वतन्त्र प्रेसको अभ्यासलाई नियन्त्रण गर्ने ठहर गर्दै नेपाल पत्रकार महासंघ यतिबेला आन्दोलित छ । महासंघको अगुवाइमा भएको प्रदर्शनमा नागरिक समाजका अगुवा तथा आम सर्वसाधारण पनि सहभागी थिए ।
प्रदर्शनमा सहभागीहरुले मुखमा कालोपट्टी बाँध्नुका साथै प्रेस स्वतन्त्रता तथा नागरिक अधिकारसम्बन्धी विभिन्न नारा लेखिएका प्लेकार्ड बोकेका थिए ।
काठमाडौंबाहिर पनि जिल्ला सदरमुकाममा पत्रकारहरुले सञ्चार साधनसहित प्रदर्शन गरेका छन् ।
