प्रतिनिधिसभाका सांसदद्वय एकवाल मियाँ र प्रदीप यादवले अज्ञानतावश ’स्वतन्त्र तिब्बत’को वकालत गर्ने अन्तर्राष्ट्रिय सम्मेलनमा भाग लिन पुगेको स्पष्टिकरण दिएका छन् ।
सोमबार विज्ञप्ति जारी गर्दै सांसदद्वय मियाँ र यादवले जानाजान नभई अज्ञानतावश लाट्भियाको राजधानी रिगामा भएको स्वतन्त्र तिब्बतको वकालत गर्ने ’तिब्बतबारे सातौँ विश्व संसदीय सम्मेलन’मा भाग लिन पुगेको प्रष्टिकरण दिएका हुन् ।
सांसदद्वय मियाँ र अन्सारीले व्यक्तिगत भ्रमणमा टर्की, स्वीजरल्यान्ड र लाट्भिया गएका थिए । त्यही अवसरमा लाट्भियामा भएको उक्त सम्मेलनमा भाग लिन पुगेको भन्दै क्षमायाचनासमेत गरेका छन्। मियाँ राष्ट्रिय जनता पार्टी, नेपालका सांसद हुन् भने यादव समाजवादी पार्टी, नेपालका सांसद हुन् ।
दुवै पार्टीले उनीहरू स्वतन्त्र तिब्बतसम्बन्धी कार्यक्रममा सहभागी भएको भन्दै प्रष्टिकरण दिन भनेको भनेका थिए । विज्ञप्तिमा नेपालको संविधान प्रचलित कानुनले निर्धारण गरेका अन्तर्राष्ट्रिय सम्बन्ध तथा नेपाल सरकारको एक चीन नीतिप्रति सदैव प्रतिवद्धता र दृढ समर्थन रहेको कुरा हृदयदेखि नै व्यक्त गर्न चाहन्छौँ भनिएको छ ।
उक्त सम्मेलन बैशाख २४ देखि २७ गतेसम्म आयोजना भएको थियो । जसमा स्वतन्त्र तिब्बतसम्बन्धी कार्यपत्रहरूमा छलफल भएको थियो ।
