नेपाली कांग्रेसका वरिष्ठ नेता रामचन्द्र पौडेलले पार्टीको १४ औं महाधिवेशन टार्ने चलखेल सुरु भएको बताएका छन् ।
राष्ट्रिय जागरण अभियान अन्तर्गत मंगलबार कैलालीको हसुलियामा आयोजित कार्यकर्ता भेलालाई सम्बोधन गर्दै वरिष्ठ नेता पौडेलले पार्टी संगठनका सबै काम ढिलाढिला गरेर महाधिवेशनलाई पछाडि धकेल्ने चलखेल अहिलेबाट सुरु भएको बताएका हुन् ।
पार्टीमा विजय गच्छदारको पार्टी मिलेपछि समायोजनको काम गर्न ढिलाइ गरिएको र संगठनलाई संविधानको संरचना अनुसार बनाउन ढिला गरिएको बताए । उनले यसबाट महाधिवेशन टार्ने चलखेल स्पष्ट भएको बताए ।
नेता पौडेलले पार्टीका भ्रातृ संगठनको अधिवेशन सभापति शेरबहादुर देउवाले रोकेको आरोपसमेत लगाए । संवैधानिक परिषद्को बैठकमा सहभागी नभएर सभापतिले ठूलो गल्ती गरेको भन्दै उनले यस विषयमा पार्टीभित्र समीक्षा हुन जरुरी रहेको बताए ।
