चीनले नेपालसम्म रेल मार्ग बनाउन कठिन रहेको बताएको छ । बिहीबार काठमाडौंस्थित चिनियाँ दूतावासमा पत्रकार सम्मेलन गरी नेपालका लागि चिनियाँ राजदूत हउ यान्छीले रेलमार्ग कठिन भएपनि रेल ल्याउने कार्यमा चीन सरकार प्रतिबद्ध रहेको बताइन् ।
उनले यस विषयमा नेपाल सरकारको तर्फबाट पनि सकारात्मक पहल भइरहेको बताइन् । राजनीतिक सहमति भयो भन्दैमा भोलि नै रेलवे लाइन बनिहाल्छ भन्ने छैन भन्दै उनले रेल नेपालसम्म ल्याउन चिनियाँ सरकार पूरै प्रतिबद्ध रहेको बताइन् ।
क्रस बोर्डर रेलवे लाइन निर्माण भौगोलिक रुपमा धेरै कठिन र धेरै खर्चिलो रहेको उनले बताइन् । यसका लागि अझै विस्तृत र वैज्ञानिक अध्ययन आवश्यक रहेको उनको भनाइ थियो । बिभिन्न चार चरणका काम पूरा गर्नुपर्ने भन्दै उनले अहिले पहिलो चरणको प्रि फिजिबिलिटीको काम मात्र सकिएको बताइन् ।
