प्रमुख प्रतिपक्षी दल नेपाली कांग्रेस संसदीय दलका प्रमुख सचेतक बालकृष्ण खाँणले प्रधानमन्त्री केपी शर्मा ओली शक्तिको उन्मादले निरंकुश शैलीमा राजा ज्ञानेन्द्रको पथमा हिँडेको आरोप लगाएका छन् ।
पार्टीको जारी राष्ट्रिय जागरण अभियान अन्तर्गत शुक्रबार काठमाडौं निर्वाचन क्षेत्र नम्बर १० मा पर्ने किर्तिपुरमा अयोजित कार्यक्रममा नेता खाँणले प्रधानमन्त्री ओली ज्ञानेन्द्र पथमा हिँडेको आरोप लगाएका हुन् ।
विश्वमा समाप्त भएको कम्युनिस्टले नेपालमा एक दलिय शासन लाद्न खोज्दा जनताको हक अधिकार कुण्ठित हुने भन्दै नेता खाँणले कांग्रेस सदैव सचेत हुन जरुरी रहेकोमा जोड दिए ।
सरकारका नराम्रा कर्तुतको समाचारहरु एकपछि अर्कोगरी सञ्चार माध्यममा आउन थाले पछि प्रधानमन्त्री ओली मिडियालाई नियन्त्रण गर्न उद्दत रहेको उनको आरोप थियो ।
उनले नेपालको राजनीतिक इतिहासमा पहिलो पटक प्रधानमन्त्रीले संसदमा बोलेका शब्दहरु रेकर्डबाट हटाइएको पनि टिप्पणी गरे ।
