शहिद धर्मभक्त राष्ट्रिय (मानव अंग) प्रत्यारोपण केन्द्रका कार्यकारी निर्देशक डा. पुकारचन्द्र श्रेष्ठले गायिका आनी छोइङ डोल्माका नाममा निजी अस्पतालमा व्यापार गर्दै आएपछि विवादमा तानिएका छन् ।

सरकारी अस्पतालमा निर्देशक रहेका डा. श्रेष्ठले गायिका आनी अध्यक्ष रहेको आरोग्य फाउन्डेसनको नाम दुरुपयोग गरी आफ्नो र आफ्नै छोरीको लगानी रहेको निदान अस्पतालमा समेत काम गर्दै ब्रम्हलुट मच्चाएका छन् ।

आफ्नो नामको दुरुपयोग गर्दै डा. पुकारले निजी अस्पतालमा व्यापार गर्न थालेपछि आनी उनीसँग रुष्ट भएको निदान अस्पताल कर्मचारी श्रोतले बताएको छ । पछिल्लो समय उनीहरुबीच सम्बन्ध चिसिएर बोलचाल नै बन्द हुने अवस्थामा पुगेको बताइएको छ ।

गरिब बिरामीलाई सस्तो र गुणस्तरीय प्रयोगशाला सेवा उपलब्ध गराउने भन्दै आनीको अध्यक्षतामा आरोग्य फाउन्डेसन स्थापना भएको थियो । डा. पुकार फाउन्डेसनका महासचिव हुन् । फाउन्डेसन र निदान अस्पताल एउटै परिसरमा रहेको छ ।

मिर्गौला फेल भएका बिरामीलाई सहज रुपमा कम शुल्कमा डायोलाइसिस सेवा दिन र मिर्गौला प्रत्यारोपण गर्नुपूर्व अनिवार्य रुपमा गर्नुपर्ने एचएलए जाँचका लागि फाउन्डेसन खुलेको हो । फाउन्डेसनले एचएलए मेसिन सञ्चालन गर्नुपूर्व नेपालमा उक्त मेसिन कँही पनि थिएन । मिर्गौला प्रत्यारोपण गर्नुपर्ने बिरामीले उक्त परीक्षण गर्न भारतमा पठाउनु पर्ने बाध्यता थियो ।

गरिब बिरामीलाई सहज रुपमा सेवा दिने उद्देश्यले खोलेको फाउन्डेसनलाई डा. पुकारले दुरुपयोग गरेर व्यापार गरेको भन्दै फाउन्डेसन स्रोतले गैरनाफामूलक र सेवामूलक फाउन्डेसनको दुरुपयोग भएपछि आनी र डा. पुकारबीच विवाद भएको बताएको छ ।

फाउन्डेसनले एचएलए, डायलाइसिस र ल्याबका अन्य सेवाहरु सञ्चालन गर्दै आएको छ । निदान अस्पतालले फाउन्डेसनकै ल्याबबाट नै सबै काम चलाउँदै आएको छ । तर, फाउन्डेसनको ल्याबको सबै रकम भने निदान अस्पतालले लिएर ब्रम्हलुट मच्चाएको छ ।

बिरामीलाई सस्तोमा गुणस्तरीय सेवा दिन खोलेको फाउन्डेसन अन्तर्गत रहेको ल्याब निदानको स्वार्थमा प्रयोग भएको बताईएको छ । निदान अस्पतालका सबै बिरामीको रिपोर्ट फाउन्डेशनको प्रयोगशालामा परीक्षण हुने गरेको तर निदान अस्पतालले फाउन्डेशनलाई कुनै पनि शुल्क भने नतिर्ने गरेको निदान अस्पताल प्रशासनका एक कर्मचारीले जानकारी दिए ।

महँगो शुल्कमा निदान अस्पतालको स्वार्थमा फाउन्डेशनका मेसिन प्रयोग हुन थालेपछि आनीले विरोध गरेपछि डा. पुकारसंग आनी रुष्ट भएको बताएको छ ।
निदान अस्पतालका लागि डा.पुकारले सुरुमा आनीसँग २ करोड रुपैयाँ लिएर लामो समयसम्म नतिरेपछि आनीले पटक पटक रकम फर्काउन माग गरेपछि अस्पतालले किस्ताबन्दी रुपमा आनीको पैसा तिरेको श्रोतले बतायो ।
फाउन्डेसनका लागि विगतमा च्यारिटीलगायतका काम गरेर सहयोग रकम संकलन गर्दै गरिबको सेवामा जुटेकी आनीको नाम समेत डा. पुकारले दुरुपयोग गरेकोचर्चा चलेको छ ।

डा. पुकारले आनी र फाउन्डेसनको नाम दुरुपयोग गरेको कुरा फाउन्डेसनका अन्य पदाधिकारीलाई समेत चित्त नबुझेको बताईएको छ । आमाको मिर्गौला फेल भएर मृत्यु भएपछि आनी मिर्गौला रोगीको सेवामा लागेकी हुन् ।

आनी छोइङ अध्यक्ष रहेको फाउन्डेसनमा व्यापारी, कलाकारदेखि अन्य थुप्रै चिरपरिचित र प्रतिष्ठित व्यक्तिहरू समेत रहेका छन् । फाउन्डेसनको उपाध्यक्षमा संयुक्त राष्ट्रसंघको सहायक महासचिव भइसकेका व्यक्ति कुलचन्द्र गौतम रहेका छन् ।

फाउन्डेसनको कोषाध्यक्षमा सुदर्शनराज पाण्डे छन् भने सदस्यहरुमा क्रमशः नेपाल उद्योग वाणिज्य महासंघका पूर्व अध्यक्ष कुशकुमार जोशी, कलाकारद्वय मदनकृष्ण श्रेष्ठ तथा हरिवंश आचार्य, डा. विमल कुमार थापा र नविना श्रेष्ठ सहित डा. पुकारकी श्रीमति समेत रहेका बताईएको छ ।

केन्द्रका निर्देशक डा. पुरकारले दाताहरले मानव अ.गलाई दिएका कतिपय अत्याधुनिक मेशिन समेत निदानमा पुर्याएको र मानव अंगमा त्यसको रेकर्ड समेत नराखेको रहस्य बाहिर आएको छ । उनका विरुद्धमा बोल्ने जो सुकै कर्मचारीको जागिर खाईदिने धम्की दिएपछि कर्मचारीहरुले ब्रम्हलुट टुलुटुलु हेर्न बाध्य भएको बताईएको छ ।

मुटुको सेवा सुरु गर्ने किनेको ३० करोडको मेशिनमा डा. पुकारले ३ करोड कमिसन खाएर मेशिन थन्क्यार राखेको केन्द्रका कर्मचारीले बताएका छन् ।

अस्पतालका सामानहरु निदान पुर्याउन र अस्पतालमा ब्रम्हलुट मच्चाउन सजिलो होस भनेर डा. पुकारले केन्द्रका प्रशासन प्रमुखमा समेत निदान अस्पतालमा काम गरिरहेका हरिहरलाई ल्याएर नियुक्ती गरेको केन्द्रका श्रोतले जानकारी दिएको छ ।