राजधानीमा लगातार बम विस्फोट भएपछि प्रमुख प्रतिपक्षी नेपाली कांग्रेसले मानवीय क्षतिप्रति गम्भीर ध्यानाकर्षण भएको जनाएको छ ।
पार्टी प्रवक्ता विश्वप्रकाश शर्माले जारी गरेको विज्ञप्तिमा हिंसा, निषेधको राजनीति त्याग्न सरकार र नेत्रविक्रम चन्द विप्लव समूहलाई आग्रह गरेको छ।
बम बिस्फोटका घाइतेलाई उपचारको व्यवस्था गर्न कांग्रेसले सरकारसँग माग गरेको छ। शान्तिपूर्ण संवादको विकल्प नरहेको भन्दै शर्माले हिंसाले कसैले विजय नहुने उल्लेख गरेका छन्। बम बिस्फोटनमा पर्नेहरु विद्रोही हुन् कि विपक्ष हुन् उनीहरुको जीवन अमूल्य रहेको कांग्रेसको भनाइ छ।
‘ललितपुरमा केही महिनाअघि भएको विस्फोट, भोजपुरमा जेठ ७ मा भएको ‘फेक इन्काउन्टर’ र आइतबार काठमाडौंमा भएको घटनाले शान्तिपूर्ण संवाद भन्दा समाधानको अर्को विकल्प छैन भनेर प्रष्ट्याएको कांग्रेसको ठहर छ ।
सबै शक्ति विकासमा लाग्नुपर्ने बेला हिंसामा लागेको भन्दै कांग्रेसले चिन्ता जनाएको छ।
राजधानीमा भएका बम विस्फोटका घटनामा चार जनाको मृत्यु भएको छ भने सर्वसाधारण आतंकित भएका छन् ।
