गृहमन्त्री रामबहादुर थापाले काठमाडौंमा आइतबार भएका विष्फोटका घटनामा परी मृत्यु भएकाहरु चारैजना प्रतिवन्धित नेकपाका कार्यकर्ता भएको जानकारी दिएका छन् ।

सोमबार प्रतिनिधिसभाको बैठकमा सार्वजनिक महत्वको विषयमा बोल्दै गृहमन्त्री थापाले आइतबार भएका विष्फोटमा परी घाइते भएका अधिकांश व्यक्ति पनि प्रतिवन्धित नेकपाका कार्यकर्ताहरु भएको जानकारी दिएका हुन् ।

‘विप्लव’ नेतृत्वमा रहेको नेकपाले जनसरकारको रुपमा जनपरिषद र जनसेनाको रुपमा चारवटा कम्पनी दर्ता गरेर आवान्छित गतिविधि गरिरहेको जानकारी सरकारसँग रहेको उनले बताए ।

गृहमन्त्री थापाले नेकपालाई वार्ताद्वारा समस्या समाधानका लागि पहल गरिरहेको पनि जानकारी दिए ।

उनले भने,‘यो समूहलाई नियन्त्रण गर्ने र वार्ताद्वारा मुलधारमा ल्याउने प्रक्रिया अगाडि बढाएको छ, मूलधारमा ल्याउन र गतिविधि नियन्त्रण गर्न राज्य प्रतिवद्ध छ ।’ उनले देशव्यापी भ्रष्टाचारको विरोधमा भन्दै एनसेल टावर र विभिन्न ठाउँमा विप्लवले ध्वंश मच्चाएको बताए ।