भारतीय प्रधानमन्त्री नरेन्द्र मोदीको आगामी बिहीबार हुने शपथ ग्रहण समारोहमा नेपालका प्रधानमन्त्री केपी शर्मा ओलीलाई पनि निम्तो गरेका छन् ।
सपथ ग्रहण समारोहमा सहभागी हुन प्रधानमन्त्री ओली बिहीबार नयाँदिल्ली जाने भएका हुन् । मोदीको शपथ ग्रहण कार्यक्रम भारतको राष्ट्रपति भवनमा आगामी बिहीबार साँझ ७ बजे हुने कार्यक्रम रहेको छ ।
सन् २०१४ मा मोदीले आफ्नो शपथ ग्रहण समारोहमा दक्षिण एशियाली क्षेत्रीय सहयोग संगठन सार्कका सदस्य राष्ट्रका कार्यकारी प्रमुखलाई निम्तो गरेकोमा यसपालि भने बिमस्टेक राष्ट्रका कार्यकारी प्रमुखलाई बोलाएको छ ।
भारतीय जनता पार्टीले सार्वजनिक गरेको चुनावी घोषणापत्रमा यसपालि सार्कको नाम नलिइ बिमस्टेकको मात्रै नाम लिइएको थियो । बिमस्टेकमा पाकिस्तान सदस्य छैन । त्यसैले पाकिस्तानका प्रधानमन्त्री भने सो कार्यक्रममा जान नपाउने भएका छन् ।
