अमेरिकी राष्ट्रपति डोनाल्ड ट्रम्पले मेक्सिकोबाट आफ्नो देशमा आउने सबै सामानमा कर लगाउने घोषणा गरेका छन् ।
ट्रम्पले आफ्नो ट्विटमा जुन १० तारेखदेखि ५ प्रतिशतका दरले कर लगाइने र अवैध आप्रवासी प्रवेशको समस्या समाधान नभएसम्म त्यसलाई विस्तारै बढाउँदै लैजाने जनाएका छन् । अमेरिकी राष्ट्रपतिले आफ्नो देशको दक्षिणी सीमामा भइरहेको समस्या समाधानका लागि यसअघि गएको फेब्रुअरी महिनामा राष्ट्रिय संकटकालको घोषणा गरेका थिए ।
मेक्सिकोका एक कुटनीतिज्ञ जेसस सीडीले भने ट्रम्पको कर लगाउने कुराले विध्वंशक अवस्था ल्याउने बताएका छन् । यदि त्यस्तो गरियो भने आफूहरुले पनि गम्भीर रुपमा कदम चाल्ने उनले चेतावनी दिएका छन् । ह्वाइट हाउसको वक्तव्यमा त्यसखालको कर आगामी अक्टोबर महिनासम्म हरेक महिना ५ प्रतिशतका दरले बढ्दै जाने बताइएको छ ।
