गुल्मीको धुर्कोट गाउँपालिकाले १५० जनालाई रोजगारी दिएको छ ।

सरकारले सुरु गरेको प्रधानमन्त्री रोजगार कार्यक्रममार्फत ३० दिनका लागि १५० जनालाई रोजगारी दिइएको गाउँपालिका प्रमुख भुपाल पोखरेलले जानकारी दिएका छन् ।

१३ जनालाई शिक्षण संस्थामा, ४ जनालाई स्वास्थ्य संस्थामा, १५ जनालाई सिँचाई कुलो मर्मतमा, १५ जनालाई कृषि र पशुपालनमा, ७ जनालाई विद्युत मर्मतमा, १५ जनालाई खानेपानीमा र ८१ जनालाई सडकमर्मतको काम दिइएको उनले जानकारी दिए ।

धुकोर्ट श्रम, रोजगार तथा सामाजिक सुरक्षा मन्त्री गोकर्ण विष्टको निर्वाचन क्षेत्र हो । मन्त्री विष्टले आफ्नो प्राथमिकता स्वदेशको रोजगारी भएको र अबको पाँच वर्षभित्र बाध्यात्मक वैदेशिक रोजगारीको अन्त्य गर्ने बताउँदै आउनुभएको छ ।

यो वर्ष थप पाँच लाख युवालाई स्वदेशमै रोजगारी दिने सरकारको योजना छ । प्रधानमन्त्री रोजगार कार्याक्रम कार्यान्वयनका लागि मात्रै ५ अर्ब १ करोड बजेट बिनियोजन गरिएको छ ।