रुकुम । रुकुममा विहिबार दिउँसो नेपाली काँग्रेस र माओवादी केन्द्रका कार्यकर्ताबीच झडप भएको छ । जिल्लाको बाँफिकोट गाउँपालिका–६ मा झडप हुँदा नेपाल तरुण दलका तीन र वाइसिएलका पाँचजना कार्यकर्ता गरी आठ कार्यकर्ता घाइते भएको बताइएको छ ।

झडप हूनूमा माओवादी केन्द्र जिम्मेवार रहेको काँग्रेस दलका वडाध्यक्ष विनोद कुसारीले बताएका छन् । उन्को अनुसार काँग्रेस निकट तरुण दलको आन्तरिक बैठक बसिरहेको अवस्थामा वाइसिएलले आक्रमण गर्न खोजेपछि झडप भएको स्पष्ट पारे । यता माओवादी कार्यकर्ताले भने बाटोमा हिँडिरहेको अवस्थामा तरुण दलले आक्रमण गरेपछी झडप भएको जनाएका छन् ।

झडपका क्रममा तरुण दलका हरि बस्याल, धनबहादुर विक, रवि केसी तथा वाइसिएलका प्रचण्ड केसी, प्रकाश ओली, विवेक विक, आकाश परियार र नरबहादुर पुन घाइते भएको बताइएको छ । घाइतेको अवस्था सामान्य रहेको भएपनि थप घटना नहोस् भनेर त्यस क्षेत्रमा सुरक्षा सतर्कता बढाइएको प्रहरीले बताएको छ ।