काठमाडौं। नेपाली कांग्रेसले स्थानीय निर्वाचनलाई केन्द्रित गरी ७५ वटै जिल्लामा गाउँ जागरण अभियान सञ्चालन गरेको छ। कांग्रेसले देशका सबै जिल्ला, निर्वाचन क्षेत्र, नगर र गाउँमा पार्टीको संगठनलाई चुस्त दुरुस्त बनाउन मंसिरमै ७५ जना केन्द्रीय सदस्यलाई ७५ जिल्लामा खटाएको थियो।

पार्टीको निर्देशन अनुसार केन्द्रीय नेताहरु तोकिएको जिल्लामा गएर पार्टीको अवस्था, स्थानीय निर्वाचनमा मुख्य प्रतिस्पर्धा कुन ठाउँमा कुन दलसँग हुने, त्यसका लागि कांग्रेसले लिनुपर्ने चुनावी रणनीति लगायतका विषयमा जिल्ला नेतृत्वलाई निर्देशन दिनुभएको थियो ।
कांग्रेसका वरिष्ठ नेता रामचन्द्र पौडेलले स्थानीय निर्वाचनलाई केन्द्रित गरेर जति तयारी हुनुपर्ने हो, त्यति काम पार्टीबाट हुन नसके पनि जिल्लास्तरमा पार्टी सुदृढीकरण भने सबै जिल्लामा जारी रहेको बताउनुभयो। उहाँले केन्द्रीय सदस्यहरु पनि गएका र जिल्ला समितिले गाउँगाउँमा कार्यकर्ता परिचालन गर्ने कार्य गरेको जानकारी दिए ।

केन्द्रीय प्रतिनिधिहरुले जिल्ला, क्षेत्र, नगरदेखि गाउँ समिति, भ्रातृ संगठनलाई पनि चलायमान बनाउन निर्देशन दिनुभएको छ। जिल्लामा खटिएका प्रतिनिधिहरूले जिल्लाको विकास निर्माणको अवस्थाबारे पनि जानकारी लिएका छन् ।