काठमाडौं । फागुन १४ का लागि तय गरिएको स्वतन्त्र विद्यार्थी युनियनको निर्वाचन स्थगित हुने चरणमा पुगेको छ । विद्यार्थी संगठनको विरोधको कारण त्रिभुवन विश्वविद्यालयले निर्वाचन प्रकृया अघि बढाउन सकेको छैन् । क्याम्पसमा लगाएको तालाबन्दीको कारण निर्वाचनसँग सम्बन्धि कार्यहरु अघि बढ्न नसकेको जनाइएको छ ।

आज त्रिवविले उपत्यकामा गरेको क्याम्पस प्रमुखहरुको भेलामा सबै क्याम्पस प्रमुखहरुले यथास्थितिमा निर्वाचन हुन नसक्ने जनाएपछि त्रिविवि निर्वाचन स्थागित गर्ने मनस्थितिमा रहेको छ । तत्कालै त्रिविवि कार्यकारी परिषद्को बैठकबाट निर्णय लिने तयारी गरिहेको उपकुलपतिको कार्यालयले जनाएको छ ।

क्याम्पस प्रशासमा नेपाल विद्यार्थी संघका असन्तुष्ट पक्ष तथा विप्लव माओवादी विद्यार्थीले ताला लगाएपछि निर्वाचन प्रकृया अघि बढ्न सकेको छैन् । उनीहरुले २८ वर्षे उमेर हदको विषयलाई लिएर ताला लगाएको जनाएका छन् । फागुन १ गते गर्ने भनिएको मतदाता नामावली प्रकाशन हुन सकेको छैन् ।

नेपाल विद्यार्थी संघ तथा एमाले अखिलको दोहोरो भूमिका भएकाले निर्वाचन समस्या देखिएको छ । नेविसंघ केन्द्रीय नेताहरु नै दुइ भागमा बाँडिएका छन् अध्यक्ष नैनसिंहर महर निर्वाचनको पक्षमा रहेको देखिएको छ भने अन्य केन्द्रीय नेताहरु २८ वर्षे उमेर हदको विरोध गर्दै आइरहेका छन् ।

एमाले अखिलमा पनि अध्यक्ष नविना लामा र महासचिव ऐन महरबीचको द्वन्द्वले अखिल पनि प्रत्येका क्याम्पसमा विभाजित देखिएको छ । सँगै विप्लव माओवादी अखिलले पनि अबरोध गर्दै आइरहेको छ ।