काठमाडौं । उपत्यका ट्राफिक कार्यालयले काठमार्डौमा पैदल यात्रुका लागि नयाँ नियम लागू गरेको छ । साउन १ गतेबाट लागू हुने गरि ल्याएको नियममा पैदल यात्रुले जथाभावी बाटो काटेमा उसलाई दुई घण्टा प्रशिक्षण दिने जनाएको छ । प्रहरीले सचेतनामुल कार्यक्रम भने पनि यो नियन्त्रणमुखी कार्यक्रम हुनेछ ।

महाशाखाका प्रमुख एवं प्रहरी वरिष्ठ उपरीक्षक वसन्तकुमार पन्तले आकाशे पुल र जेब्राक्रसिङबाट यात्रुलाई बाटो काट्न सिकाउनका लागि यो अभियान संचालन गरेको जनाएको छन् । उनका अनुसार पहिलो चरणमा उपत्यकाका १२ ओटा स्थानमा लागू गरिने जनाएको छ ।

पहिलो चरणमा ठिमी, कोटेश्वर, नयाँ बानेश्वर, थापाथली, त्रिपुरेश्वर, पुरानो बसपार्क, केशरमहल, सिंहदरबार, गौशाला, महाराजगञ्ज, कालीमाटी र जावलाखेलमा यो अभियान संचालन गरिने छ । यसका लागि प्रहरी निरीक्षकको नेतृत्वमा एक जवान खटाएको छ । टोलीले बिहान ९ देखि ११ बजे र साँझ ४ देखि ६ बजेसम्म सडकमा बसेर प्रशिक्षण दिनेछ ।

महाशाखाले नयाँ सडकद्वार, वीर अस्पताल, भोटाहिटी, जमल, रणोद्धिप, पुरानो बसपार्क, भद्रकाली, नागस्थान र नयाँ बसपार्कमा आकाशे पुलको प्रयोग गर्न यात्रुलाई आग्रहसमेत गरेको छ । पुल नभएको स्थानमा जेब्रा क्रसिङबाट मात्र सडक पार गर्न भनिएको छ ।