काठमाडौं । नेपाली कांग्रेसले पार्टीबाट निर्वाचित जनप्रतिनिधिले आफूखुशी कर बढाए कारबाही गर्ने जनाएको छ । पार्टीले जारी गरेको निर्देशनमा भनिएको छ, जनतालाई मार्कामा पर्ने गरी कर बढाएमा पार्टीले कारबाही गर्ने भनिएको छ । उक्त निर्देशनमा यदि कर बढाएको भए तुरुन्त फिर्ता लिन पनि भनिएको छ ।
कांग्रेसले यही भदौ दोस्रो साता देशभरीबाट आफ्ना निर्वाचित प्रतिनिधिलाई डाकेरै निर्देशन दिने भएको छ । निर्वाचित अध्यक्ष, मेयर, उपमेयर तथा उपाध्यक्षलाई काठमाडौं बोलाएर निर्देशन दिने भएको छ ।
उसले जनतालाई रोजगारी, उद्यमशीलता तथा आर्थिक बृद्धिका लागि उचित कार्यक्रम ल्याउन पनि भनिएको छ । साथै, जनताप्रति उत्तरदायी बन्न र जनमुखी कार्यक्रम ल्याउन पनि निर्देशन दिएको छ ।
स्थानीय तहमा आफू खुशी जथाभावी कर लगाउन थालेपछि जनस्तरबाट बिरोध भएको छ । जन्म, मृत्यु, नागरिता सिफारिस लगायतका जनसरोकारका विष्नयमा पनि कर लगाएपछि स्थानीय मारमा परेका थिए । यतिमात्र नभई अछाम, कञ्चनपुर लगायतका स्थानमा पशु तथा कुखुरामा पनि कर लगाएपछि त्यसको देशव्यापी बिरोध भएको थियो ।
बिरोध भएपछि नेपाली कांग्रेसका महामन्त्री शशांक कोइरालाले शनिबार नेपाली कांग्रेसले स्थानीय तहलाई निर्देशन दिने भनेका थिए । त्यसको लगत्तै आइतवार कांग्रेसले देशभरी कर घटाउन र भावी दिनमा पनि नबढाउन निर्देशन जारी गरेको छ ।
कांग्रेसको निर्देशनपछि नेकपा तथा मधेशावादी दलहरु कठीनाईमा परेका छन् । कांग्रेसले सबै जननिर्वाचित प्रतिनिधिलाई काठमाडौं डाकेर निर्देशन दिने भएपछि सरकारले यसलाई नजिकबाट नियाली रहेको बालुवाटार श्रोतले जनाएको छ ।
file photo
