काठमाडौं । राष्ट्रिय जनता पार्टी (राजपा) ले सरकारले धोका दिएको गम्भिर आरोप लगाएको छ । वर्तमान सरकार गठन भएपछि संविधान संशोधन गर्ने तथा मधेशका मुद्दाहरु सम्बोधन गर्ने सर्तमा सरकारलाई समर्थन गरेको थियो । सरकार गठन भएको ७ महिना पुगिसक्दा पनि कुनै ठोस निर्णय नगरेपछि राजपाले सरकारलाई दिएको समर्थन फिर्ता लिने भएको छ ।
सरकारले मधेशलाई धोकादिएको निश्कर्ष निकाल्दै सरकारलाई समर्थन नदिने र फिर्ता लिने बारे आज बसेको बैठकमा ठूलो बहस भएको जनाइएको छ । अध्यक्ष मण्डलको बैठकमा सबै अध्यक्षहरुले सरकारको चर्को आलोचना गरेको जनाइएको छ ।
बैठकपछि अध्यक्ष मण्डलका अनिल झाले संविधान दिवसका दिन असोज ३ गते देशव्यापी रुपमा विरोधको कार्यक्रम गर्ने निर्णय भएको जानकारी दिए ।
उहाँले मधेसका मुद्दा र मागलाई सम्बोधन गर्दै संविधानमा समयानुकुल संशोधन गर्ने सरकारको भनाईप्रति आफूहरु विश्वस्त हुन नसकेको भन्दै पार्टीले आगामी दिनमा कस्तो रणनीति तय गर्ने भन्ने विषयमा पनि छलफल भएको जानकारी दिए ।
यसरी सरकार राजपाबीचको दूरी निकै बढेको देखिन्छ । यसले सरकारलाइ कुनै असर नपरे पनि सरकारप्रतिको हेराइमा भने फरक पर्ने देखिन्छ । र, मधेशमा आन्दोलनका लागि उचित वातारण बन्नेछ ।
