काभ्रे । राष्ट्रियसभा अध्यक्ष गणेश तिमिल्सिनाले संविधानले दिएका अधिकार कार्यन्वयन गर्न तीन तहका सरकार योजना बनाएर अगाडि बढ्नुपर्ने बताउनुभएको छ ।

काभ्रेमा शनिबार आयोजित एक कार्यक्रममा अध्यक्ष तिमिल्सिनाले नेपालको संविधानले जनतालाई धेरै अधिकार प्रदान गरेको बताउँदै ति अधिकार जनतासम्म पु¥याउन तीन तहका सरकार लागिपर्नुपर्ने धारणा राख्नुभयो । ‘नेपालको संविधान विश्वमै उत्कृष्ट छ । यसले जनतालाई धेरै हक र अधिकार दिएको छ,’ उहाँले भन्नुभयो, ‘तर, यो चुनौतीपूर्ण छ । त्यसलाई जनताको झुपडीसम्म पु¥याउँन संघीय, प्रदेश तथा स्थानीय सरकारले योजना बनाएर दिनरात काम गर्नुपर्छ ।’

जनताले आफ्नो अधिकारको आभाष गर्न देश समृद्ध हुनुपर्ने धारणा अध्यक्ष तिमिल्सिनाले राख्नुभयो । उहाँले संविधानअनुसार तीन तहमा स्थायी सरकार बनेपछि अब सबै नेपालीले देश समृद्ध बनेको हेर्न चाहेको बताउनुभयो । उहाँले तीन तहका सरकारको समन्वय र सहकार्यमा गाउँ–गाउँसम्म सडक, बिजुली, शिक्षा, स्वास्थ्यलगायत विकासका पूर्वाधारलाई निमार्ण तथा स्तरउन्नतीमा जोड दिनुपर्ने सुझाब दिनुभयो ।