सर्लाही । जंगली हात्तीले सर्लाहीको लालबन्दी नगरपालिका–३ जब्दीमा एउटा घर भत्काएको छ । बिहान ३ बजे देखा परेको हात्तीले स्थानीय नरेश पासवानको घर भत्काएको हो । 

जंगली हात्तीले घरभित्र राखिएको अन्नपात समेत खाएको स्थानी अर्जुन चौधरीले जानकारी दिए ।

रानीगंजहुँदै जब्दीतर्फ पुगेको हात्तीले बाटोमा के कति क्षति गर्यो भन्ने विवरण प्राप्त हुन बाँकी छ । ईश्वरपुर नगरपालिकाको सागरनाथ, गौरीशंकरलगायतका क्षेत्रमा आतंक मच्चाइरहेको जंगली हात्ती राती अचानक लालबन्दी नगरपालिकामा प्रवेश गरेको हो । 

तीन ओटाको संख्यामा रहेका हात्तीले हिरापुर, रानीगञ्जहुँदै केही समयअघि गौरीशंकरतर्फ पुगेको थियो । सर्लाहीमा यसरी जंगली हात्ती देखा परेको महिना दिनभन्दा बढी भैसकेपनि नियन्त्रणको प्रयास नभएको भन्दै सर्वसाधारणले गुनासो गरेका छन् । 

हात्तीले घर भत्काएका र अन्नबाली नष्ट गरेका पीडितले क्षतिपूर्ति समेत पाउन सकेका छैनन् । डिभिजन वन कार्यालयले समूहमा रहेको हात्तीलाई नियन्त्रणमा लिन समस्या हुने जनाएको छ । 

एक महिना अगाडि यिनै हात्तीले रानीगंजका मिनबहादुर कार्की इश्वरी पौडेल लगाएकाको घरमा क्षतिपुर्याएको थियो ।